វៀតណាម៖ រដ្ឋាភិបាលវៀតណាម នឹងបង្កើនគោលដៅក្នុងការផ្តល់វ៉ាក់សាំងយ៉ាងហោចណាស់ឱ្យបាន ៥០ភាគរយនៃចំនួនប្រជាជនរបស់ខ្លួនដែលមានវ័យលើសពី ១៨ឆ្នាំត្រឹមចុងឆ្នាំ២០២១នេះ ហើយនឹងបន្តផ្តល់វ៉ាក់សាំងឱ្យបានយ៉ាងហោចណាស់ ៧០ភាគរយទៅលើចំនួនប្រជាជនពេញវ័យរបស់ខ្លួន ត្រឹមខែមីនា ឆ្នាំ២០២២ខាងមុខ។

ក្រសួងសុខាភិបាលវៀតណាមបានដាក់ចេញនូវផែនការយុទ្ធសាស្រ្តថ្មីនេះ ក្រោយពេលដែលវៀតណាមកំពុងប្រឈមនឹងការគំរាមកំហែងធ្ងន់ធ្ងរ ទាក់ទងទៅនឹងការរាតត្បាតទ្រង់ទ្រាយធំនៃវីរុសកូវីដ-១៩ នៅទូទាំងប្រទេស ជាពិសេសគឺការបិទខ្ទប់ទីក្រុងហូជីមិញ ដែលជាទីក្រុងសេដ្ឋកិច្ចពាណិជ្ជកម្មដ៏ធំបំផុតរបស់ខ្លួនរយៈពេល ២សប្តាហ៍ចាប់ពីថ្ងៃសុក្រនេះ។

ការបិទខ្ទប់ទីក្រុងហូជីមិញរយៈពេល ២សប្តាហ៍នេះ ក្រោយពីវៀតណាមបានប្រកាសពីករណីឆ្លងកូវីដ-១៩ថ្មីលើសពី ១,០០០នាក់ក្នុងមួយថ្ងៃចំនួន ៤ដង ដោយកន្លងមក វៀតណាមគឺជាប្រទេសមួយដែលទទួលបានការកោតសរសើរខ្លាំងពីពិភពលោក ជុំវិញតួលេខឆ្លងមានត្រឹមតែជាង ៣,០០០នាក់ប៉ុណ្ណោះ តាំងពីវីរុសកូវីដ-១៩ផ្ទុះឡើងជាលក្ខណៈសកលនៅដើមឆ្នាំ២០២០ មកទល់នឹងខែមេសា ឆ្នាំ២០២១។

គិតមកដល់បច្ចុប្បន្ននេះ វៀតណាមបានទទួលវ៉ាក់សាំងចំនួនជាង ៦លានដូសហើយ ដែលភាគច្រើនទទួលបានក្រោមយន្តការវ៉ាក់សាំង COVAX ហើយក្នុងនោះមានវ៉ាក់សាំងប្រហែលជាង ៤លានដូសត្រូវបានចុះបញ្ជីប្រើប្រាស់រួចរាល់ ប៉ុន្តែបើតាមទិន្នន័យដែលទទួលបាន មានមនុស្សប្រមាណជា ២២៥,០០០នាក់ប៉ុណ្ណោះដែលបានទទួលវ៉ាក់សាំងទាំង ២ដូសរួចរាល់។ គិតមកដល់ពេលនេះ វៀតណាមបានកត់ត្រាអ្នកឆ្លងកូវីដ-១៩ ចំនួន ២៤,៨១០ករណី និងមានអ្នកស្លាប់ចំនួន ១០៤នាក់៕